التدوينة المائة (Happy Birth Day)

النهارده يوم خاص جدا فى مدونتى النسر المهاجر لسببين 

السبب الأول

إن دى التدوينة رقم 100 فى مدونتى والحمد لله توافقت مع السبب التانى

السبب التانى 

إن النهارده عيد ميلاد مدونتى الخامس

قبل كده محتفلفش بمرور اعوام على مدونتى ولكن المره دى بيتوافق الحدث مع التدوينة رقم 100

مدونتى اول مبدأت الكتابه بها حبيت أجعل لها طابع خاص وجميل وزى كل مدون كنت عايزها تكون بشكل مشرف

والحمد لله لم يبدى أحد عليها أى تعليق من قبل 

حبيت أقسم المدونة لأقسام كان فيه تقسيم قديم بس معجبنيش فقسمتها التقسيم الجديد

ركن كتاباتى : وده الركن الأساسى فى المدونة (تدويناتى الخاصة)

ركن مقالات أعجبتنى : من اسمه مقال عجبنى وأحب الكل يستفيد منه

ركن قصة وعبره : بعض القصص فى حياتنا ممكن يكون فيها عبره لينا حتى لو خياليه 

ركن من أجل صحتك :الركن المفضل لى حيث العوده لأحضان الطبيعه مره أخرى ومعرفة قيمة ما خلقه الله وطبعا ليس مرجع طبى 

ركن معلومات خفيفه  : ده بعتبره ركن مشاركه فى الثقافه العامة  ويكفينى لو قدرت أفيدك بمعلومة ممكن تنفعك فى حياتك أو تقيك ضرر أى شئ أو تستخدمها وقت الحاجه اليها وفيه معلومات غريبه كمان

ركن مناسبات : طبعا باين من اسمه وكل سنة وأنتم طيبين أنا فى الركن ده دلوقتى :)

ومر على فيها مدونين وزوار منهم الى قفل مدونته ومنهم إلى خرج من التدوين ومنهم الى مستمر بالزيارة والتدوين 

وأكيد أنت واحد منهم وبجد منورنى ديما 

فيه مجموعه من المدونين لهم مكان خاص فى مدونتى وفى قلبى كمان بكلماتهم وموضوعاتهم الجميلة والشيقه وأكيد هما عارفين نفسهم لانهم هما دائما الى متواجدين فى مدونتى وباستمرار..

أنا سعيد جدا إن المدونه بقالها خمس سنين وما زالت موجوده  رغم إنقطاعى عنها فتره كانت فى خدمة بلدى مقدرش أتأخر والحمد لله لما رجعت ليها لقيت أحبائى المدونين ما زالووا فاكرينى  

من الحاجات كمان الى بتضحكنى دلوقتى مع انى كنت متغاظ جدا وقتها إنى كنت بكتب عن الروتين فى المصالح الحكوميه كتير بصراحة كنت مخنوق وقتها جدا بس يلا ايامها عدت بس الروتين موجود 

النسر المهاجر لم تكن اول تجربة لى فى عالم التدوين ولكن التجربه القديمة تم إزالتها من عالم التدوين ... ليه معرفش :) !

معلش بقى لو ملخبط الكلام شوية فصحى وشوية عامى النهارده مفيش كنترول قول الى تحبه .

 

كنت هكتب اسماء المدونين الى زارونى حتى لو انقطع عن الزياره ولكن خوفا انى انسى أى شخص عدلت عن الفكره دى  

لكن تأكد / ى  إنك منهم

بحبكم كلكم

أخوكم