29‏/06‏/2013

العجوز وأنا

أولا وقبل أى شئ فسوف أسرد موقف حدث معى أى أن هذا الموقف حقيقى وحدث فعلا ولكنى تعلمت منه أشيائا كثيره 
منذ فتره قصيرة لا تتعدى شهر كنت بعمل مستخرج رسمى من مركز الشرطه الذى أتبعه وقال لى الشرطى أن الورق سوف يستخرج على الساعة الواحده ظهرا وكانت الساعه
حوالى الحادية عشر فأردت إنتظار هذا المستخرج فجلست على قهوة بلدى أحتسى مشروبى المفضل السحلب وشاء القدر أن جلست بجوار رجل كبير فى السن ولكن حدثت بعض المواقف منه كانت غريبه بعض الشئ بالنسبه لرجل يعيش فى زماننا هذا فلقد كان يتناول وجبة الإفطار وامامه فنجان من القهوة وكان يجلس على يسارى وهناك شخص أخر كان يجلس بالقرب منا ويظهر عليه علامات الفقر وكان على وشك ترك القهوة فبعد ان فرغ الرجل العجوز من طعامه وشرب القهوة طلب من القهوجى الحساب فقال له 6 جنيهات وأراد أن يدفع للرجل الفقير أيضا فأصبح الحساب 8 جنيهات فأخرج عشرون جنيها وقال للقهوجى خذ حسابك و2 جنيه ليك وقسم ال10 جنيهات بينك وبين من يحضر الطلبات ففسرت ذلك بانه نوع من الصدقه وطيبة القلب وكان يظهر على الرجل أنه إجتاز السبعين من العمر وبعد حوالى عشر دقائق نادى القهوجى وطلب منه رباط ضاغط ليده فذهب القهوجى وأحضر الرباط وكان اعطاه عشرون جنيها أخرى فكان تكلفة الرباط 4 جنيهات وقال له قسم الباقى بينك وبين من يحضر الطلبات لم أستطع تفسير ذلك هل صدقه او أنه يتخذها وسيلة جذب إنتباه للاخرين عموما قد يكون بدافع الصدقه أيضا .
ولأن القهوة من الداخل ذات مساحة صغيره فكان هناك أربعة رجال يجلسون لشرب الشيشه  وياتون بالتبغ الخاص بهم لانهم يضيفون عليه عسل لا أعلم لماذا ولكن بعض الاشخاص يقومون بهذا السلوك  والشيشه التى أمامهم لا تنطفئ نارها فحدثنى هذا الرجل بالحديث بهذا الحديث وسوف أسرده بالعاميه كلغة الحوار الذى دار بيننا
العجوز : الناس دى بتهلك صحتها وصدرها وبتغضب ربها منها علشان ايه يعنى يشيل معسل فى جيبه ويخلطه فى بيته ويعلم ولاده يدخنوا
أنا  : والله يا حاج دى بقت عاده عندهم ممكن يغيروها لكن طبعا هيقولوا صعب ربنا يهديهم 
العجوز : أنا عمرى مدخنت فى حياتى غير مرة أو اتنين وحلفت إنى مش هدخن تانى
أنا : صدرك نضيف يا حاج يبقى ليه تبوظه 
العجوز : يبنى التوعيه زمان مكنتش زى دلوقتى زمان كان ممكن يحرقك بحديدة ويقولك بعالجك من البرد 
أنا : طبعا كنت هموت من الضحك وابتسمت بس إحتراما له  بس قولتله العلم إتقدم والناس بقت عارفه الصح من الغلط والى عايز يغلط فى النهايه على دماغه 
العجوز: مهو الغلط لو إنتشر هيبقى على دماغنا إحنا كمان وجيلنا خلاص يلا حسن الختام إنما الاجيال الجاية ذنبها ايه 
أنا : لنا الله يا حاج وبعدين يا ريت المشكله فى التدخين بس إنما كل حاجه بقت أى كلام 
العجوز : فعلا حتى الاكل مبقاش له طعم أكل زمان لو موجود دلوقتى كان إتباع بالجرام 
انا : قولتله موجود يا حاج بس بالواحده ممكن تشتريه من المزارع الأورجانك (الزراعة العضوية) بدون مبيدات أو سماد 
العجوز : يلا هنعمل ايه أدى الله وأدى حكمته 
وسكتنا لحد كده وقولت الحمد لله شوية والأخبار اشتغلت والجيش الحر وسوريا والحورارت الى بنسمعها كل يوم عن سوريا لقيت الحاج إتكلم تانى 
العجوز : العرب دلوقتى بقى ملهمش لازمه ولا كرامة كل واحد بيدور على القرش الى فى جيبه والكرسى الى تحته وبيتفسحوا بره وسيبين الشعب يموت مش واجب عليهم إنهم يحرروا سوريا 
أنا :بس سوريا النزاع  فيها داخلى هما فعلا مفروض يتدخلوا بس تدخلهم مش كعرب أو مسلمين إنما لازم تدخلهم يبقى كمجتمع دولى 
العجوز : مجتمع دولى ايه هما ميعرفوش معنى كلمة مجتمع دولى دول يعرفوا البنك الدولى  بس العرب كانوا زمان
أنا : عرب زمان يا حاج كانوا محتلين وطالع عنيهم ومكنش فيه بلد مستقله 
العجوز : أنا بتكلم عن عبد الناصر 
أنا : عبد الناصر كان له عيوب هو كمان بس منكرش إنه كان رئيس مميزاته أكتر أو على الأقل كان المصرى له كرامة 
العجوز : أه  فعلا كان المصرين هما الى بيعمروا دول العرب أيام مكانوا لسه بدو
أنا : بس مفيش حد فيهم حمل الجميل له ولا لمصر
العجوز : هما ديما كده زى الست المطلقه لازم تتهان فى بيت ابوها علشان ترجع لجوزها وتعرف إنه حلو لازم يتضربوا كلهم علشان يتحدوا
أنا : يلا يا حاج ربنا يعمل الى فيه الخير
طبعا عم الحاج كان فى ايده جرنال قديم كان لافف فيه الأكل بتاعه وفيه خبر عن الجراد الذى يجتاح مصر ومكتوب وزير الزراعه يؤكد أننا قضينا على تقريبا 71521 المهم رقم زى ده وكان فيه كسور بس الاحاد بتاعه كان واحد قام الحاج إصطادنى تانى
العجوز : الحكومة الى موجوده دى بتستخف بعقولنا أل يعنى الوزير قعد يعد جثث الجراد وفى لأخر لاقى جراده ميته فى زاويه فحطها ديما إستخفاف إستخفاف إستخفاف هنعمل ايه فى البلد دى حكومة شيوخ وبيكدبوا وعارفين إن الناس هتعرف إنهم كدابين 
أنا : أنت مش تايه يا حاج عن أخبار الجرايد زى أفلام الاكشن لازم حته تشويق 
العجوز :أنت بتايدهم
أنا : لا والله اي حاج بس كنت أتمنى إنهم يبقوا كويسين علشان مستقبلنا يبقى منور وجميل
العجوز :مسيرها تفرج المهم ربنا يعدى ايامهم على خير 
أنا : يا رب يا حاج
وفى نفس الوقت دخل القهوة واحد ملتحى وطلب حلبه حصى وشيشه لقييت الحاج قام قالب على الراجل ومكمل كلامه
العجوز : مش عارف الناس دى بتربى دقونها ليه مفروض أخر حاجه تبقى الدقن
أنا : مش فاهم يا حاج بس دى سنة 
العجوز : يعنى الواحد بعد ميحس إنه بقى بعيد عن الشبهات ويتبع السنن كامله يتممها بالدقن مش يبقى فلاتى ويجى يطبق السنة يبتدى بالدقن انا مثلا فى التربية والتعليم وحتى الان بيقابلنى طالبات كانوا عندى بقوا شبات ولما بيقبلونى بيسلموا على طيب لو واحد شافنى بسلم عليهم وأنا مربى دقنى هيقول الشيخ ده مش محترم بيسلم على واحده ميعرفهاش وهو مربى دقنه عادى  فانا لما ألتزم بكل السنن أبقى أتممها بالدقن
أنا : ربنا يجازيك خير يا حاج 
وقعدت خمس دقايق وجات الساعه واحده وسيبت القهوة والحاج بس فضل الحوار بتاعه معلق فى عقلى فترة طويلة لانى بجد استفدت منه حاجات كتيره حتى من أسلوبه وكلامه ويمكن من الحاجات الى فادتنى إنى لازم أستحمل كبار السن لانهم بيحاولوا يتكلموا مع الناس علشان يحسوا إنهم لسه موجودين وطبعا اراء الحاج ده الى معرفتش اسمه حتى انا بعتبرها اراء سليمة .... أتمنى مكونش طولت عليكم

هناك 12 تعليقًا:

  1. الله
    جميل اووي
    كالعادة طبعا استفدت جدااااا

    ردحذف
    الردود
    1. الحمد لله إنها عجبتك
      وجميل إنك استفدتى لكن بصراحة أول مره أحاور شخص معرفوش
      بس انا كمان إستفدت منه

      حذف
  2. الردود
    1. طبعا مر عليكى ناس زى الشخصيه دى
      بس بصراحة هو طول على :)

      حذف
  3. انا بقي العكس خااااااااالص
    تلاقي الناس تحب تتكلم معايا
    متعرفش هو يعني انا فيا حاجة كدة بتخلي الناس تكلمني وتحيكي لي
    وبحب كدة اووي حتي وانا تعبانة
    بحب الناس تفضفض معايا

    ردحذف
    الردود
    1. النا س ديما بتحب تتكلم مع الاشخاص الى بترتاح ليها بصرف النظر عن كونهم يعرفوهم أو لا

      حذف
  4. اتعلمت استحمل كبار السن !!! ليه انت ماكنتش بتستحملهم ياللللللللللللللهوى دا الكلام مع الناس دى متعه متتتتتتتتتتتتتتتتعه بس هما عايزين بالراحة حوار زى مانت عملت كدا يا خببببببببببببررررررررررررر وبعد ين ياعنى لانى خبرة فى الموضوع دا هما مش زى ماحضرتك قولت انهم بيتكلموا علشان يحسوا انهم موجودين خاااااااالص وخصوصا لو حد كان فى مجال معين كويس هما بيتكلموا من باب احساسهم بالمسؤليه احساسة انه شاف كتير يخليه يعرف يحكم صح بنسبة كويسة فبينورك كدا بالعربى :) جميل فحتتتتتتتتتتت الراجل والبوست والحوار واسلوبك اكيد :)

    ردحذف
    الردود
    1. ربنا يخليكى علىزوقك فى الرد وأنا كمان على فكره بحب أتكلم مع الناس دى بس لما بكون مزاجى حلو إنما لما بكون مشغول بحب أختصر فى الكلام وزى منتى عارفه هما لما بيمسكوا واحد ممكن يحكيله 80 سنه وهو قاعد

      سلمتى أختى الكريمة على مرورك الدائم

      حذف
  5. انا استمتعت اوي بالحوار الجميل دة

    ممتع جدا الحوار مع الناس الكبيرة بتحس انك بتستفيد من كل كلمة وحرف هما بيقولوها بجد تسلم ايدك كنت معبر جدا

    ردحذف
    الردود
    1. شكرا لكى على مرورك الى بيشرفنى ويسعدنىكثيرا وأتمنى دوام التواصل
      وفعلا الناس دى بيبقى معاها حكمة السنين وثقافة الأيام بالغضافه لثقافة الكتب طبعا

      حذف
  6. الحوار جميل والاجمل طريقة سردك لة لدرجة انى حسيت انى كنت قاعدة على الترابيزة اللى جنبكم هههه بجد سردك للحكاية سهلة وممتعة وعلى فكرة انا بحب الكلام مع كبار السن جدا الكلام معاهم بيبقى فية حاجة حلوة يمكن الطيبة والتلقائية .ودى واحترامى
    انسانة

    ردحذف
    الردود
    1. إنسانه

      نورتى المدونة وأتمنى من الله التواصل الدائم

      وإذا حبيتى تسمعى هذا الشخص فهو موجود لكن قد يختلف الحوار ههههههه
      وشكرا على زوقك فى التعليق ومنورة مكانك ديما

      حذف