03‏/10‏/2013

الحياة بين أنامل بشرية

الحياة 
مدرسة متعددة اللغات ومتعددة الثقفات ومتعددة الإتجهات والأفكار كذلك 
قد نقول ان الروح هى الأساس فى الحياة 
وهذا صحيح 
ولكنها لازمة لحياة البدن مثل الطعام والشراب وهى الأساس فى التكوين البشرى
بعض الاشخاص يربطون بين الروح والنفسية البشرية البعض يعتقد انهم أصحاب مدلول واحد 
والبعض بيعتبر دى حاجه ودى حاجه

ولكن المشكله مش هل الروح موجوده أو لا إنما المشكله هل النفس موجوده أم لا
ممكن البعض يقول انى اتجننت صح لان كلنا هنقول طبعا النفس موجوده
لكن انا بقول انها احيانا بتكون مش موجوده 

زى بالظبط لما نقول الشخص ده كويس فبالتالى هو حى فى قلوبهم وفلان ده مش كويس فبنقول انه ميت فى قلوبهم
مع انه فى الحالتين حى بالتنفس فقط

النفس البشرية كمان ممكن تكون حية أو ميته زى مجيه فى القرأن
 "ونفس وما سواها فألهمها فجورها وتقواها"
يعنى الإنسان فى الحالتين مخير بين التقوى والفجور

وبما ان مفيش حد مبيغلطش  فيه انسان بيرجع لربه بسرعه وواحد لا 
وبرضه فى الحالتين محدش يعرف هيموت امته ولا ازاى وهل هيكون على تقوى ولا معصية 
وربنا يميتنا على التقوى 

مع ان المعصية ممكن تكون كذب أو نميمة مش شرط معصية كبيرة(كبائر)
برضه مش ده الى عايز اتكلم فيه

ممكن أقول انى بتعجب فى النفس البشرية أحيانا لما بنعمل الى عايزينه سواء صح او غلط بنكون سعداء جدا وراضين الا لو انسان نفسه بتلومه على الغلط. ولو حاجه مش بنحبها بنكون مهمومين جدا سواء صح او غلط بس ضميره بيقوله ان ده الصح اذا كان صح
يعنى ربنا خيرنا وادانا الجنود الى توجهنا للصح ديما

و لو عندنا عربية باى ماركه وحبينا نصلحها ...يا ترى هنروح لتوكيل ماركه تانيه يصلحها طبعا لا 
هنروح للتوكيل صاحب العربية 
ونفسنا برضه لما يحصل فيها اختلال وضيق يبقى نروح للى خلق النفس دى (سبحانه وتعالى)

الحياة غالبيتها ممل وكلنا عارفين ده حتى الحاجه الى بنعملها علشان تلزمنا وبنستفيد منها ساعات كتير تكررها بيولد الملل
لكن بنلاقى اوقات كتير فيها سعاده برضه  ليه نركز مع اوقات الضيق ونسيب اوقات الفرح
ليه نركز ان الشغل كان صعب ولما نرجع البيت مش نركز ان فيه زوجه صالحة وابناء حبهم بالدنيا كلها
ليه لما نرجع من الجامعه نبقى حاسين ان المحاضرات اكلت مخنا ومش حاسين ان ثقافتنا زادت معلومات كتير
لو كل واحد قعد نص ساعه قبل مينام يسال نفسه ايه الى عملته صح وايه الى عملته غلط واصلحه ازاى
لو لقى حل هينام مرتاح ولو ملقاش هينام مرتاح لانه عرف المشكله على الاقل بس للأسف أنا مش كده :(

ربنا اعطانا الحياة علشان نستغلها ونكسب الدنيا والأخره لو الدنيا قاسيه ابسط حاجه نخلى اخرتنا كويسه وهى الاطول مهما عشنا عمرنا قصير زى التلميذ فى اول السنه يفتكر السنة طويلة وأول متبدأ الاجازه  يقولك كانت لحظه برضه الإنسان وهو بيموت هيعرف ان الحياة لحظة

كان فيه كلمة قراتها على كراسه وأنا فى ابتدائى وحفظتها بس فهمتها لما كبرت 
"دقات قلب المرء قائلة له إن الحياة دقائق وثوانى"

المشكله الكبيره ان الانسان اول مبيضايق ويخرج عن حالته الطبيعيه بيعمل اى تصرف
سواء صح أو غلط وقتها مش بيعرف هو بيعمل ايه بس المشكله بيندم بعد ميفوق 
بس هل يفيد الندم زى الى ضرب رصاصة على شخص وقبل مالرصاصة تصيبه ندم انه هيقتله يا ترى هيعرف يرجع الرصاصة
طبعا هو مش هيلحق يفكر اساسا بس ده مجازا متدققش على كل حاجه

والمشكله الاكبر انه ممكن يحب الموت ويحاول يوصل ليه بانه ينتحر أو يضر صحته علشان يموت والنتيجة فى الإتنين واحده اسمه انتحار يعنى هتفرق تموت نفسك بسكينه أو تاخد حبوب بالتدريج الإتنين انتحار وربنا مش بيسامح المنتحر لانه قنط من رحمة ربنا وتوعده بالنار وهيجى بنفس الصورة الى انتحر عليها

حتى لو مفكرش فى الإنتحار بس بيتمنى يموت ده بقى ربنا بيعجل له فى اخرته وبيدخله النار لانه برضه قنط من رحمة ربنا
بدل ميطلب مساعدته ويتضرع لله ويعمل الى عليه بيتمنى يخلص من حياته

والغريبه إن ربنا استأمنك على حياتك تقوم تضيع الامانه ليه أو مش تحافظ عليها
أنت مش احن من ربنا عليك مهما كنت بتحب نفسك 
ربنا بيبتليك فى الدنيا علشان يشيل عنك ذنوب انت ترفض ليه
لو متضايق متبصش للى أحسن منك بص للى اسوء منك وارضى بحياتك
ابسط حاجه فى الحياة

أنت لاقى مكان تنام فيه فيه ناس بتنام على الرصيف من غير غطا والدنيا بتمطر شوفتهم ولا لا
أنت لاقى اكل وبتقول ده كويس وده وحش وأنا بحب كذا ومش بحب كذا فيه ناس بتاكل البواقى الى بترميها فى الزبالة 
فيه ناس بتاكل قشر الفول بعد مترميه
حضرتك لاقى حمام تستعمله غيرك مش بيلاقيه ومبياخدش شاور اساسا
أنت عندك شغل أه ساعاته طويله ومرهق بس غيرك من كتر الفضوا الى هو فيه بيفكر يعد النجوم ويطلع عددهم الحقيقى
أنت عندك زوجه واطفال غيرك لا عنده ولا الزوجه ولا الأطفال وفيه الى عنده الزوجه ومفيش اطفال
انت عندك والدك ووالدتك (بابى الجنة) غيرك ميعرف مين ابوه ومين امه

لو نعمه واحده من دول فقدتها هتحس بقيمتها جدا بس علشان موجوده أنت مش مقدرها
ولو كلها مش عندك وواحده فيهم اتحققت ليك هتفضل تحمد ربنا طول حياتك يعنى تخيل الى بينام على الرصيف لاقى سرير شوف مدى سعادته والى بياكل من الزبالة لاقى وجبات أكل كل يوم هيطير من الفرحة حتى لو لاقى وجبه واحده نضيفه
تخيلها وأنت هتحس بقيمة الحياة 

ربنا وزع الأرزاق وده مش ظلم انما وزعها علشان نحتاج بعض
 لان لو كل واحد متوفر له كل حاجه مش هيسال عن حد مش هيبقى فيه تراحم ممكن الواحده تولد ابنها وترميه لانه هياخد رزقه فى كل حاجه مدام كلنا متساوين فى الارزاق  لما الواحد والده هيكبر مش هيقف جمبه لانه واخد حقه كامل

يبقى الحياة ليها قيمة ولا لا ومش شرط السعاده تلاقيها فى تحقيق حلمك أو الى أنت عايزه ممكن تبقى سعيد لو جعلت  شخص تانى سعيد وهو فى قرارة نفسه هيقول ان ربنا هو الى بعته وهيقول انك راجل محترم وعارف ربنا علشان كده ربنا خصك بالخير ده

لو قابلك واحد بياكل من الزبالة خده مطعم وإطلب له أكل وسيبه ياكل و بص فى عنيه وشوف هو فرحان قد ايه وبيقدرك قد ايه مع انك مش هتديله أكل كل يوم

الحياة تستاهل اننا نعشها ونحبها حتى لو كان وجودنا فيها اختبار نهايته جنة أو جهنم 
المهم انها هبة من الله وربنا اختار لينا الحياة دى ورضى لينا اننا نعيش فيها 
الى صنعك حطك هنا وطلب منك العمل علشان يكافئك ولو بوظت العمل ده اكيد هتتعاقب

 مينفعش تشترى كمبيوتر وتحطه على مكتب ويقولك مش شغال هنا 
طبعا هتقولى احنا لينا عقل والكمبيوتر مش ليه

هقولك متنساش ان ربنا هو الى عاطيك العقل ده 
يا ريت تفكر بيه وتستعمله مدام بتعترف ان ليك عقل
والا انت والجماد واحد فى عقلك وقلبك

أعتذر للإطالة انا عارف ان الكلام مش مرتب بس بجد أنا حسيت ان الناس بقت بتكرهه أكتر متحب حتى وصل كرهها لحياتها 
يا ريت كل واحد يراجع نفسه ويسامحنى لو الكلام معجبوش 

هناك 12 تعليقًا:

  1. هى دى الطبيعة البشرية عموما
    وحتى فى الموروث الشعبى تلاقى الناس بتخاف على فرحتها من الحسد فمابتحكيهاش ولما يصيبها مكروه تولول وتنسى كل الخير واهو بردو من باب درء العين :)

    عجبتنى التأملات

    ردحذف
    الردود
    1. ريماس منورانى ديما

      الناس مبقتش على طبيعتها ومبقاش حد عنده قناعه باى شئ وللأسف ده بقى فينا كلنا
      بس المشكله فيه الى يصبر وبيعمل الى عليه وفيه الى بيصبر وخلاص وفيه الى بيلوم الدنيا والظروف ولا هو صابر ولا هو بيعمل الى عليه
      حتى زى مقولتى كده العالم كله لو حد عنده فرح بيظهره ولو حزن بيحاول يخفيه علشان مياثرش على نفسية غيره إحنا بقينا العكس تماما بدعوى الحسد وغيره . حتى الحسد له علاج ولكن الطبائع البشرية اصبحت مرض بلا علاج


      تحياتى لكى

      حذف
  2. من الطبع البشري النسيان
    ممكن يعمل الغلط ويوقل مش هكرره تاني
    وبعدين يكرره
    عشان نسي
    انا عن نفسي بوم نفسي وبحاسبها واعاتبها اذا فعلت خطأ
    ولكني كأنسانة ممكن اعمل الغلط ده تاني بشكل او بأخر
    لكني احاةول ان لا اقع فيه والله يعنا علي انفسنا

    ردحذف
    الردود
    1. رحاب صالح

      كونك بتعرفى الغلط وتعالجيه ده فى حد ذاته هو المطلوب حتى لو عملتيه مليون مره لكن بتعالجيه فى النهاية
      إنماا للأسف ناس كتير بتستسلم له بحجة إن ده قدرنا وربنا عايز كده وإن غصب عنى مهو ده الطبيعى اننا بنغلط غصب أو ضعف ولكن المهم إننا نصلح الغلط ده

      تحياتى لكى

      حذف
  3. جمال ابو العز ...
    كلام معقول .. والسعادة بتيجى مع الرضا .. والرضا هو تقبل الواقع وشكر الله على هذا وادراك واقع غيرك
    "الحياة تستاهل اننا نعشها ونحبها حتى لو كان وجودنا فيها اختبار نهايته جنة أو جهنم" تستاهل لو قدرناها
    تمام
    تحياتى

    ردحذف
    الردود
    1. Well
      شكرا لك أخى على مرورك وتشريفى بالتعليق ديما واتمنى يكون كلامى الملخبط ده نال اعجابك
      تحياتى

      حذف
  4. عارف الحياة بسيطة جدا واقل حاجة فيها بتخلينا سعداء بس اْهم حاجة اْننا نرضى بما قسمة الله لنا
    ويكون عندنا قناعة بما رزقنا الله من بيت واولاد ومال وكمان كدة . كدة رزقنا مكتوب واحنا في رحم امهاتنا
    وكمان تكون قلوبنا نظيفة واهم حاجة يكون ضميرنا حى .. واذا غلطنا معلش الانسان مش معصوم من الخطاْ
    بس اهم حاجة اْننا نتعظ من اخطئنا . والحياة جميلة بمن فيها واول حاجة فيها طاعة الله والاستعانة بة وكمان اعملنا
    الطيبة وكمان كل اللى بنحبهم ... واْخيرا اقول لك يااارب نظف قلوبنا من الطمع ..
    اللهم اعنا على ذكرك وشكرك وحسن عبادتك ... امين
    اشكرك ابنى الفاضل على تميزك في طرح مواضيعك . وبارك الله فيك .

    ردحذف
    الردود
    1. إنسانة
      الرضا اهم شئ فى الحياة لان عدم وجوده هو سبب كافى لزوال النعمه والقنوط من رحمة ربنا
      وأنا بعتذر ان كان البوست شبيه بالطلاسم ههههههههههههههه لانه غير مرتب
      وعلى فكره انا عمرى مزعلت منك ولا من اى مدون أو زائر لمدونتى فالكل أناس يوصف بهم الإحترام
      وشكرا لدعواتك الجميلة القيمة وربنايتقبل منا ومنكم

      وأنا الى واجب على اشكرك أمى الغاليه وأعتزر إن وجدتى صوبة فى ترتيب افكار البوست
      فأحيانا يكون حلاوة الكلام فى غموضه
      وأعتذر عن تاخرى فى التعليق :)
      تحياتى لكى أمى الغاليه

      حذف
  5. مدرسة مؤقته نتعلم فيها كيف نحمل معنا زاد الاخرة

    ردحذف
    الردود
    1. شمس النهار

      منورانى ديما

      ويا رب ننجح فى الدنيا والاخره

      حذف
  6. قال رسول الله صلى الله عليه وسلم: (عجبا لأمر المؤمن إن أمره كله خير وليس ذاك لأحد إلا للمؤمن ، إن أصابته سراء شكر فكان خيرا له وإن أصابته ضراء صبر فكان خيرا له") ان في هذا الحديث مفتاح السعادة في الدنيا والاخرة ولكن ليس الجميع يراه تماما مثل الذي يشتري جهاز ولا يكلف نفسه عناء قراءة الكتالوج المرفق ليفهم الجهاز ويستطيع التعامل مع الصعوبات التي قد تواجهه عند استخدامه.
    موضوع رائع وشامل وواقعي وبيلخص اسباب كل المشكلات اللي بتواجهنا في الحياة من وجهة نظري
    يمكن متصدقنيش لو قلتلك اني كنت حاسة وانا بقرأ الموضوع اني بقرأ كتاب افكاري
    تحياتي واحترامي

    ردحذف
    الردود
    1. صدق رسول الله صلى الله عليه وسلم
      وصدقتى انتى ايضا كل منا لا يجد الكتالوج الا بالطاعه
      وشكرا على كلامك الجميل دائما
      وأنا مصدقك . لان مدونتك هى اقرب مدونة فى الاسلوب للنسر المهاجر فى عالم التدوين
      تحياتى لحضرتك

      حذف