18‏/12‏/2013

صالح وطالح

لعبة الخير والشر
الخير والشر أقدم صفتين على وجه الارض اتحققوا فى نزول أدم من الجنة وقتل قابيل لهابيل ومازال الناس بتستعمل الصفتين وبتعمل بيهم وفى الغالب بيكونوا متحققين فى نفس الوقت بس ده مش ديما .

وهتفضل الصفات دى موجوده لحد يوم الحساب حتى يوم الحساب هيبقى فيه خيرين واشرار وكل واحد معروف مكانه فين .سمعت دكتور أمراض نفسيه مره بيقول كل انسان فى صفاته الخير والشر بس لو الخير هو الى ظاهر بنعتبره انسان صالح ولو الشر هو الى ظاهر بنقول انسان طالح (شرير) .
كل انسان بيكون موجود فى الحياة بيشوف الخير والشر وبيتعامل مع الإتنين وبيختار يكون فى حزب منهم بس المشكله ان اختياره ده مش بيأثر عليه بس انما عليه وعلى ذريته او بعض ذريته لو كان انسان قاسى فأكيد بيربى ابنائه على القسوه وممكن ولاده يتخذوه قدوه ليهم وبكده لو مات غير سيرته السيئه بين الناس هيبقى ترك ذرية طالحه بدل ميبقى له ولد صالح يدعوا له بيبقى له ولد طالح يزود سيئاته ويدعوا عليه .
ممكن نقول هو ممكن الإنسان لو مرباش ابنه كويس ياخد سيئات على كده أكيد الجواب ايوه لانه زى مبياخد حسنات على كل ركعه ابنه ركعها مادام هو الى علمه الصلاه أكيد بياخد سيئات على كل مكان فاسد شاف ابنه بيدخله ومش ردعه عنه .
ويفضل الخير والشر متوارث بين الأجيال وكل جيل بيكون سبب فى هداية الجيل الى بعده أو فساده لكن المشكله لما الجيل الصغير بيكبر وتلاقى الجيل الكبير يقولك إنتم جيل فاسد فأكيد الرد الوحيد عليه أنتم الى طلعتوا الجيل ده فاسد لانكم الى مربينه .بس فى الغالب كل جيل بيعمل تفاهات وهو شباب ولما يكبر ويعقل بيعتبر ان التفاهات الى الجيل الى بعده بيعملها شئ غير لائق ويبتدى يوصف جيلهم انه كان فيه الخير والجيل الى موجود شياطين.
فاصل كده بره موضوع الخير والشر بس حصل معايا دايما الناس القديمة جيل الجدود يقول ايام أم كلثوم كان الطرب الأصيل وكان الأغانى ليها معانى وميذكرش اى حاجه غير الأغانى الأصيله ويقول الجيل بتاع دلوقتى شغال بالمحاره أديك فى السقف وكلام هابط واسفاف للشعبى الجديد وبصراحه عنده حق فيه موجة اسفاف كبيره وأنا مش بحب الشعبى مطلقا بس الغريبه ان الجيل القديم نسى ان كان على ايامهم "بعد العشا يحلى الهزار والفرفشه" وأغنية "أنا لسه نونو فى الحب بونو" والحب دح دح والهجر كخ كخ " طبعا أول متفكره بالأغانى دى كأن جن طلعله من الماضى لانه مش متوقع ان تفاهات جيلهم هى السبب فى ظهور عدوية والى بعده لحد دلوقتى . بصرف النظر عن ده , كل جيل بيكون مرايه للجيل الى قبله سواء فى الخير أو الشر.
نرجع تانى ديما بنلاقى الى بيفقد الوالدين او احدهم بيكون مشتاق جدا ليهم وده طبعا لفضلهم الى كلنا عارفينه ولكن لو فكر للحظه صغيره وشاف نفسه فى المرايه وطبايعه الى بيتعامل بيها مع الناس هيعرف إن الامثال الشعبيه صادقه جدا وإنه فعلا صورة اصليه من ابوه أو من امها " إلى خلف ممتش " و"إقلب القدره على فمها تطلع البنت لأمها"و" من شابه أباه فما ظلم ". ولو فكر شوية يبقى لازم يعرف إنه لازم يكون صورة صالحه ليهم علشان الناس تترحم عليهم انهم عرفوا يربوا حتى لو أنت مش كويس حاول تغير نفسك وسيبك من اراء الناس دا أنت كنت ومن امتى الطيبه دى نفض لكل ده .
 المهم إنك تقتنع ان أبوك وأمك عايشين معاك حتى بعد موتهم إذا حبيت تكلمهم ابعت ليهم السلام اذا حبيت تقولهم إنك بتحبهم ادعى ليهم وأوهب ليهم صواب اعمالك الصالحه إذا حبيت تحافظ على برك بيهم حتى بعد موتك اعملهم صدقه جاريه وتكون الإستفاده منها فى وقت طويل وأكيد ولادك لما يلاقوك كده هيعملوا ليك أنت كمان وعلى راى المثل " كله سلف ودين حتى المشى على الرجلين ". إذا حبيت تزود حسناتهم أكتر وأكتر علم أولادك العمل الصالح والعبادات هما كمان بياخدوا حسنات على كده الذريه الصالحه بتفيد بعضها بعكس الذرية الطالحه بتكون وبال على نفسها وعلى الناس وعلى جدودهم وابنائهم .
المعركة بين الخير والشر باقيه وديما الخير بينتصر وان انتصر الشر بيكون انتصار زائف لحد ميجى الى يقدر ينتصر بالخير مهما بلغ الشر وتمدد الخير فى النهايه هو الى هيظهر .
مفيش انسان خير فى المطلق أو شرير فى المطلق ممكن يكون خير وعنده حتة شر أو شرير وعنده نزعه للخير وده ممكن ربنا يهديه للخير بسرعه لان الحبل الى بين الخير والشر عنده حبل قوى مش هيتقطع إلا لما يشدو للخير لأن الخير لازم يشد الشر فى النهايه ويغلبه .
المهم إننا نعرف إحنا مع الخير ولا الشر احنا فى خانة الصالح أم الطالح.
أنا كتبت الكلام ده لانى حاسس ان كل واحد مبقاش عارف هو صالح ولا طالح هو مع الحق ولا الباطل .
وإن كان كل واحد بيقول أنا الصح .
يبقى فين الخطأ.
ومازالت اللعبة مستمره
بين
الخير والشر

هناك 22 تعليقًا:

  1. الله
    موضوع دسم جداااا
    بس في ناس مش بتعرف تسيطر علي اولادها
    مثلا في شغلي _ المدرسة _ ممكن لما عمل استدعاء لولي الامر بسبب سلوك ابنه او بنته الغير حسن يكون رده أن " معلش انا مش قادر عليه ربيه معايا ينوبك ثواب ...!!!" والله بتحصل طيب احنا علي اد ما بنقدر بنحاول نحسن سلوك الاولاد والبنات في المدرسة لكن المدرسة وحدها غير كافية وانا من رأي ان التربية هي الاساس ....لكن مع كل هذا التقدم التكنولوجي أصبحت التربية تواجه صعوبات لهذا أشفق علي الاباء والامهات ...الله يعينهم
    ويعيننا
    جميل الموضوع جداااااا احييك علي هذا الطرح الرااااااائع

    ردحذف
    الردود
    1. ربنا يخليكى ويبعد عنك كل شر

      بس الناس الى مش بسيطر على اولادها هى الى بتشجع ولادها على كده لانه بيظهر فى نظر ابنه انه ضعيف زى الطفل لما تقوليله أنت غبى حتى لو ذكى لازم يتاثر بكلامك ويسلك سلوك الأغبياء
      أنا بشفق على المعلمين لانهم هما كمان ضحيه لعدم التربية الكويسه للأبناء لكن ممكن المدرس يكون هو وسيلة الإنقاذ الأخيره للإبن إذا لم يكن أبوه وأمه صالحين ومأعتقدش ان التكنولوجيا ممكن تسببب فى الفوضى الى موجوده دلوقتى التكنولوجيا بتكون وسيله للتهذيب والتربية الأفضل فى العالم كله إنما احنا الى بنوجه أطفالنا للتكنولوجيا الضاره لاننا مش بنشغل عقولهم فى البحث عن الحاجات النافعه وللأسف ده بيكون نتيجة إن الاب والأم هما كمان ميعرفوش ايه هى التكنولوجيا النافعه يكفي ان فيه ناس حتى الان بتعتبر النت من المحرمات

      شكرا لمروك وتشريفى بالرد والحمد لله إن البوست عجبك
      وأتمنى أن تنول كل موضوعاتى إعجابك
      تحياتى أختى الكريمة

      حذف
  2. طرح رائع جدا جمال عزيزى والمعركه بين الخير والشر لم ولن تنتهى عندما كنت صغيره و اتفرج الافلام كانت كل النهايات سعيده كنت اسال امى هل ان كل النهايات سعيده ..كانت تخبرنى ان الخير هو الذى ينتصر فى النهايه ..ولكننى مع الظروف التى تحيط بالبشر من قتل وعنف ومكائد واخلاق بدات تنحدر بمستوى اغانى السح الدح وشيل الواوا بدات الافكار تتغير ومفاهيم التربيه التى كبرنا عليها الاهل لهم التاثير الاكبر ولكن يجب ان لا نغفل دور المجتمع الذى نعيش فيه وتاثيره على سلوكيات وتصرفات البعض ..الشر لن ينتهى وقد تطول ايامه فى الارض ولكن الخير هو الذى ينتصر وعذرا على الاطاله صديقى العزيز ..لك منى باقه تولب

    ردحذف
    الردود
    1. انا سعيد جدا بتعليقك
      وذا كان الأجيال بتتاثر بالمجتمع فالجيل القديم هو ديما الى بيصنع وجهة المجتمع الى بيأثر فى الجيل الى بعده يعنى الى احنا بنصنعه بياثر على الجيل الى بعدنا والى بعده أنا ذكرت الاغامى الهابطه القديمه علشان أوضح ان مفيش جيل بيجى ويعترف إن كان فيه فساد ايامه ديما بيحاول يوصل للجيل الى بعده إنهم كانوا ملايكه وان الى الفساد ده وليد الجيل الجديد من الاخر بيعمل عملية اسقاط للحاجات الشريره الى كانت موجوده وكانت السباب فى الفساد الحالى
      وكلام والدتك ليكى صحيح ان الخير هو الى بينتصر فىالنهايه حتى لو انتصر الشر بنصر زائف الا ان الخير الحقيقى بيجى فى النهايه

      وشكرا لمروك صديقتى الغالية

      حذف
  3. الخير و الشر من الموضوعات التي شغلت عقول الفلاسفة منذ بداية الفلسفة بل يمكن القول ان الموضوع هذا هو سبب نشاة الفلسفة مع مبحث الجمال ،و قد ربط الفلاسفة بين الجميل و الخير و بين القبيح و الشر ...طبعا الجميل ليس جميل الصورة و لا القبيح ايضا كذلك بل ان الخير اينما وجد فالجمال موجود و كذلك الشر
    و في عصور الانبياء ايضا كان هذا الموضوع هو الشاغل للانبياء نزع الشر و محوه و نشر الخير و اعلانه

    ردحذف
    الردود
    1. ذو النون المصرى
      منورنى يا باشا
      وتعليقك يعتبر اضافه جميله للبوست
      وإذا كانت معركة الخير والشر مستمره الا ان النتيجه معروفه فى النهايه

      تحياتى أخى العزيز

      حذف
  4. حاولت اعلق عندك مرات قبل كده و مش عارف الطريقة و الحمد لله بالصدفة عرفتها
    تحياتي لك

    ردحذف
    الردود
    1. شكرا لتواجدك المستمر وشرف لى ان حضرتك تعلق فى مدونتى برايك والى أكيد هيكون اضافه جميله للى بكتبه

      تحياتى

      حذف
  5. موضوع جميل وكالعادة سردك للموضوع بسيط وأكثر روعة من جماله
    أحييك على سرد مثل هذا الموضوع بهذه الطريقة الشيقة وكمان عايزة أقولك إن الخير دايماً بينتصر فى النهاية ع الشر مهما طال الزمن وعلى رأى ماما الله يرحمها كانت دايماً تقولى "إعملى الخير وارميه البحر" عشان كده بقيت بعمل كل خير أقدر عليه أو بحاول أكون كده ولو إنى باخد على دماغى من كتر الخير اللى بعمله لكن ربنا بيجازينى خير الحمد لله حتى لو مش فى الدنيا أكيد ربنا شايلى ده فى الآخرة ......
    ربنا يوفقك ويكرمك ؛؛؛؛؛؛

    ردحذف
    الردود
    1. ندى الربيع
      ربيع المدونه على فكره فيه جزئيه فى البوست خاصه بيكى انتى بالتحديد أو كنتى سبب فى كتبتها
      وأكيد مامتك إنسانه عظيمه انها زرعت فيكى قيم جميله فى حب الخير حتى لو مش هيرجع عليكى بحاجه
      وربنا يوفقك ديما لفعل الخير ويجازيكى عليه بالخير فى الدنيا والأخره
      شكرا لمروك الدائم أختى الغاليه
      تحياتى لكى

      حذف
  6. ازيك أخى العزيز ، شكراً ليك أوى على انك افتكرتنى فى البوست بجزئية وأنا أخدت بالى منها طبعاً وعرفت إنك تقصدنى شكراً أوى لذوقك ونصيحتك الغالية وتشجيعك ليا وفقك الله فى حياتك ؛؛؛؛

    ردحذف
    الردود
    1. ندى الربيع
      أنا سعيد جدا بتشريفى بالرد للمره التانيه
      وشرف لى أنك كنتى سبب فى كتابة جزء من موضوعى
      ويا رب تفضلى ديما تنورينى بتواجدك
      وأكيد أنتى تستحقى التشجيع والتقدير كمان
      تحياتى لكى أختى الغاليه

      حذف
  7. إزيك أخى العزيز يارب تكون بخير ؛؛؛؛

    ردحذف
    الردود
    1. أنا الحمد لله بخير مادمتى أنتى وإخوتى من المدونين بخير وسعاده
      وربنا يخليكى على سؤالك ويبارك فيكى ويعطيكى كل ما تتمنى..... اللهم أمين

      حذف
  8. ازيك أخى جمال ، ليك فترة غايب مش بتكبت حاجه جديدة ؟ ولا بتدخل على المدونة
    يارب يكون المانع خير وتكون بخير وصحة جيدة !!!!!!!!

    ردحذف
    الردود
    1. ندى الربيع
      ربنا يكرمك على سؤالك الدائم
      بس على فكره انا يوميا فى مدونتك ومدونات احبائى المدونين
      وبالنسبه للكتابه الجو برد وموقف صوابعى بفكر اكتب بقلم واصوره وانزلها :)
      شكرا ليكى اختى الكريمة على سؤالك الدائم ورمنا يديم الود ويبارك فيكى

      حذف
  9. ضحكتنى بقا عشان البرد مش بتكتب ع المدونة ؟؟ أوك ربنا يعينك
    ربنا يسعدك ، كنت رديت على رأيك فى بوست أبكيتنى ابقا شوفه كنت بسألك على قصيدة أبكيتنى مش بذمتك حلوة كده ومنسقة وجميلة ؟؟؟؟
    لك منى أرق التحية والإمتنان ؛؛؛؛

    ردحذف
    الردود
    1. ندى الربيع
      بصراحة مش البرد بس هو السبب أنا أوقات كتير بكتب حاجات وبمسحها يمكن بحس ان ملهاش قيمه بالنسبه لى انا شخصيا
      ان شاء الله هيكون فيه بوست قريب بس لسه بجمعه فى الذاكره :)
      وبالنسبه للقصيدة فهى قصيدة جميلة وبعدين دى مش اول قصيدة مرتبه وجميلة ليكى
      أتمنى تكونى بخير وتنورينى بالزياره دائما وأنتى صاحبة مكان :)

      حذف
  10. كل سنة وحضرتك طيب وبألف خير وصحة وسعادة ورضا وراحة بال وسلام وإن شاء الله يكون عام جديد سعيد عليك وعلى أسرتك الكريمة وتحقق فيه كل ما تتمنى
    :)

    أطيب تحياتي

    ردحذف
    الردود
    1. كل سنة وأنت بخير يا باشا وربنا يجعلها سنة سعيدة عليك وعلينا
      منورى ومنور مدونتى يا باشا

      حذف
  11. موضوع رائع وكتير اتكلمنا فيه انا و اخواتي وزميلاتي بالمدرسة وعجبني جدا جدا الجزئية " لازم يكون صورة صالحه ليهم علشان الناس تترحم عليهم انهم عرفوا يربوا حتى لو أنت مش كويس حاول تغير نفسك وسيبك من اراء الناس دا أنت كنت ومن امتى الطيبه دى نفض لكل ده المهم إنك تقتنع ان أبوك وأمك عايشين معاك حتى بعد موتهم إذا حبيت تكلمهم ابعت ليهم السلام اذا حبيت تقولهم إنك بتحبهم ادعى ليهم وأوهب ليهم صواب اعمالك الصالحه إذا حبيت تحافظ على برك بيهم حتى بعد موتك اعملهم صدقه جاريه وتكون الإستفاده منها فى وقت طويل وأكيد ولادك لما يلاقوك كده هيعملوا ليك أنت كمان وعلى راى المثل " كله سلف ودين حتى المشى على الرجلين " لان لو كل واحد برر خطأه بانه سوء تربية من الاهل و محاولش يصلح نفسه يبقي الدنيا مش هتستمروكمان هم بيناقضوا نفسهم لانهم مش بيربوا عيالهم كويس في حين انهم عابوا ده علي اهاليهم . وطبعا التربية السيئة سيجازي عليها الاباء ولكن الابناء ايضا سيتحملون بعض من الجزاء عندما يكبرون وتصبح لديهم القدرة علي التمييز بين الصواب والخطأ ولا يتجهون للصواب ويستمرون في طريق الضلال علي اساس ان اهلهم السبب في كده -اما ربنا عطاهم عقل ليه؟
    واكيد طبعا الخير هو اللي بينتصر في النهاية
    لك تحياتي وتقديري

    ردحذف
    الردود
    1. شكرا جدا على كلماتك الجميلة الى بتكون سابقه أى تعليق والموضوع هام جدا والجزء المقتبس كنت بحاول ابين ان الأبناء صوره لابائهم فى الخير والشر ولكن يمكن تغير الصورة وليس هناك من شئ يؤدى للإحتفاظ بالصورة السيئة
      شكرا لمرورك الدائم وخاصه فيما سبق كتابته تحياتى

      حذف