05‏/04‏/2009

بحبك يا مصر...؟


رغم إعتراضى على وجود الوساطة إلا أن المصرين أو الشعب المصرى تحديدا شعب جميل فى كل حاجه ومش بقول كده لأنى مصرى ولكن أنا بلاقى إن الشعب المصرى شعب مرح جدا ومتدين جدا تلاقى النكت فى مصر أكثر من أى دولة اخرى كما تجد التدين موجود دائما وذلك على مر العصور

تجد كبار السن يحملون من القصص ما يعبر عن حياتهم وكفاحهم وتجد لهم قصص مشوقة للأطفال وقصص خيالية تجذب لها مهما كان سنك


تجد الجيران علاقاتهم طيبه يساعدون بعضهم البعض إذا قامت بينهم شحنا تجد التصافى بسرعه

حتى إن قامت أى حادثة لشخص تجد كل الجيران والأصحاب والأحباب بجوارك

تجد الكبير ينصح الصغير وتجد الصغير يوقر الكبير

ونجد قمة الأخلاق فى ولاد البلد وبكونوا رجالة بجد يعتمد عليهم فى كل شئ

كما أن الشعب المصرى شعب مرح إلا أنه لا يسكت على حقه طويلا ويحصل عليه مهما طال الزمن

بجد أنا بحب مصر وشعبها بس إلى ملهمش فى أكل الكوسة.......!

ولو كنت مش من مصر جرب وإنزلها ومش هتندم

على ضمانتى

فهى أرض الكنانة

أرض الأمن والأمان

وعاشت مصر

هناك 6 تعليقات:

  1. السلام عليكم
    اْبدء كلامى بقوله سبحانة وتعالى:
    (رَبَّنَا آتِنَا مِن لَّدُنكَ رَحْمَةً وَهَيِّئْ لَنَا مِنْ أَمْرِنَا رَشَدًا)
    صدق الله العظيم
    اْولا لو لم اْكن مصرية لتوسلت لرب العالمين اْن اْكون مصرية واْشكر ربى على هذه النعمة والتى لايشعر بها
    اْغلب شبابنا تحت ظل ماتمر به العزيزة الغالية من ظروف ولكن مش هنعلق اللى بيحصل على الظروف فهى الكوسة ولا مفر في كل وقت وكل زمان هى الكوسة فبسبب الكوسة اْعزك الله اْخى تجد اْغلب الوظائف لاْصجاب تلك الثمرة المظلومة بيننا ودة للاْسف يعنى اللى لة واسطة هيشتغل واللى مالهوش ؟؟؟ ولى واقعة مع هذه الكوسة المغلوبة على اْمرها يعنى واقعة صغيرة اْحدى حبيباتى بالعائلة الحمد لله تفوقت وكانت الخامسة على دفعتها بالجامعة وتمنت ان تكون معيدة بالجامعة جزاء تفوقها حاولت من دون فائدة فلجاْت لعضو مجلس الشعب الموقر لدى دائرتنا فقال لها اية تخيل لو في ضمير اْو عدل في بلدنا لاْصبحتى معيدة لكن هنا للاْسف نفول سامحكى الله ياكوسة بس اْحنا خلاص
    زى ماتقول كدة اْخدنا على كدة يعنى ولاثورة نافعة
    ولا اْعتراض شافع يعنى نرضى بالمكتوب .
    بس هى برضوا بلدنا وبنحبها وبنموت فيها بجد والله وزى ماتقول كدة اْحنا روحنا فيها وهى كمان حاسة بينا تعرف المصريين ساعة الشدة اكتر من اْهل لالا اْخوات وكمان في الفرح بيسندوا بعض بجد مصر جميلة ويزيد جمالها بينا بشعبها بجد صدق اللى قال
    مصر ياست الكل ياقلب ابيض من الفل بجد مصر باْذن الله في حفظ الله .
    على فكرة البوست دة من 9..2 يعنى قبل الثورة سبحان الله تعرف انت زى ماتكون كدة كنت حاسس ان مصر هايقوم فيها ثورة مشاء الله على اْحساسك .
    طيب عشان كدة انا با اْهديلك اغنية
    مالناش غير بعض اللى عملتها موبنيل بجد تحفة ولما تسمعها كاْنك بتسمع كلام عن اْجمل حاجة في الدنيا مصر ...اْجمل واْرق واْطيب اْمنياتى لك بالتوفيق في كل حياتك اْخى الفاضل
    انسانة

    ردحذف
    الردود
    1. إنسانه
      تعرفى أنا كتبت البوست ده بسبب فرصه ضاعت منى بسبب الكوسه
      وقتها حسيت ان الدنيا اتقفلت وإنى مفيش عدل فى البلد ولكن لما فكرت لقيت فيه ناس كتير كويسين ومصر نفسها بلد تستحق الإحترام ومش معنى ان فيه جزء فاسد يبقى الناس كلها وحشين بس مصر تستحق مننا الخير مش الشر
      والموقف ده كان فى 2009 فعلا

      أما عن احساسى ان فيه ثورة هتقوم فده من 2005 وولدى هو الى إدانى الإحساس ده يعنى فى كلامه قال ان الظلم لما بيزيد الناس بتتحمل بس فيه طاقه معينة والناس بتنفجر بالثورات وأنا حسيت إن ده هيحصل بس وقت كتابتى للبوست فكرة الثورة مكنتش فى دماغى لانى مكنتش متوقع انها هتيجى بالسرعه دى
      وطبعا أجمل حاجه الهدية من انسان عزيز ويكفينى إن ده أول إهداء يجيلى على مدونتى
      فشكرا جزيلا ليكى ويا رب أيامك كلها تبقى خير وسعادة
      وإن شاء الله مصر بخير وأمان وهذا عهد من الله
      "إدخلوا مصر ان شاء الله أمنين"

      حذف
  2. السلام عليكم
    طيب نعرف بقى انا سعيدة جدا لانى باتكلم مع انسان خلوق زيك فابلرغم من صغر سنك ودة اللى انا حساة بس يااارب يعطيك العمر ويبارك لك فية يارب
    الا ان مشاء الله عليك علاقتك بربنا كويسة وجميلة جدا مشاء الله ربنا يزيدك
    وكمان على درجة كبيرة جدا من القناعة بما قسمة الله لك
    ربنا يوفقك ويرضى عليك يارب انت واولادى وكل خلق الله.. اللهم امين
    واما عن الهدية يارب اْهاديك يوم زفافك يارب . بس اوعى ماتعزمنيش هههه
    بجد واللهى ان شاء الكريم اجيلك على عينى بس ماتخفش الهدية مش هتكون غنوة ههههه ان شاء الله ... يارب يكتبلك السعادة والرضا يااارب من قلبى واللهى .... كل التحية وكل الدعاء لك بالتوفيق 0
    انسانة

    ردحذف
    الردود
    1. إنسانه

      أنا مواليد التمنينات (8) بس على فكره عمر الإنسان بيكون بخبراته فى الحياة مش عدد السنين الى مرت بيه . وكل مالخبره زادت كل ما كان الإنسان شباب
      وطبيعى إنى أعزمك أنتى والمدونين كلهم بس يا ريت تيجى ومتقوليش مش فاضيه وتبقى حجه

      وبالنسبه لى وجودك بمدونتى هو أكبر هديه ممكن يحصل عليها شخص من انسان عزيز عليه

      شكرا ليكى على زوقك ودعواتك الطيبه وربنا يرزقك السعادة ويبارك ليكى فى اسرتك وتشوفى أولادك فى أحسن ما تتمنى لهم وربنا يبارك ليكى فيهم ويجعلهم قرة عينك...

      حذف
  3. اولا يارب يعطيك العمر كلة ويبارك لك في كل دقيقة فية
    وبعدين هل يعقل ان ام تقول مش فاضية لفرح ابنها انا ادعوا الله ان يرزقك الزوجة الصالحة والبيت السعيد والزرية الصالحة الجميلة يااارب عاجلا وليس اجلا اللهم امين ... لك منى كل الدعوات بالتوفيق يارب
    انسانة

    ردحذف
    الردود
    1. لا تتخيلين مدى سعادتى بدعوتك التى اعلم اناها من قلب صافى
      وحضرتك تنورى الدنيا كلها
      وربنا يكرمك ويعطيكى من حيث لا تحتسبى

      حذف