14‏/02‏/2014

كنوز العقل البشرى

العقل البشرى فى حد ذاته أسطورة الأساطير ما لا تتخيله هو فى داخل راسك . ربنا جعل فى خلق الإنسان وتكوينه معجزه فى كل حاجه فى جسمنا نلاقى معجزة حتى الأظافر التى نقصها معجزه هذا ان علمت أنها من نفس مادة الشعر الكيرياتين ومن الاجزاء التى يوجد بها من الإعجاز ما تذهب له العقول هو المخ البشرى فخلاياه لا تتجدد مثل باقى الجسم يحتوى على الغدة النخامية (المايسترو)والتى تتحكم عن طريق 9 هرمونات فى أماكن عديدة من الجسم بالإضافة لكم السيالات العصبية التى إن درستها ستشعر بالعجز امام هذا التركيب الرهيب فى داخل كتله أقرب ما تكون لينة وطرية ولكن حديثنا ليس عن المخ فى حد ذاته وإنما عن العقل نفسه

بما أنى مش دكتور فانا هتكلم عن حاجات قراتها ومنها حاجات جربتها يعنى مش الناحية العلمية البحته إنما العلمية العادية
عرفت مثلا إن العقل البشرى قادر على تغير الحالة المزاجية قهرا يعنى لو سعيد جدا ممكن لسماعك خير مش كويس وجهك يتحول من السعاده للحزن فى ثوانى

ممكن مثلا لو عندك صداع إنك تقنع نفسك إنك سليم وراسك مش مصدعه فالصداع يروح يعنى بيسيطر على الشعور 


غير انه بيستعمل وسائل دفاعيه بيوجهها عن طريق المخ فبيلغى ارادتك ويتحكم هو فى الجسم بدل منك زى مثلا لو ريشه هتدخل عينك جفنك بيقفل بمجرد ميلمحها او لو دبوس شكك فجأه بتبعد

طيب وأنت نايم مبيبقاش فيه اراده أساسا طيب تعرف إنك لما الدورة الدموية عندك بسبب الإجهاد أو غيره تنخفض فجأه يقوم يهيئ ليك حلم إنك بتقع علشان تصحى فجأه ولما تصحى طبعا الدورة الدموية بتبتدى تشتغل وأكيد إنت مريت بالتجربه دى

بعض الناس بتضحك لما يجى مشهد القوى الروحيه فى فيلم فول الصين العظيم مع إن القوى دى موجوده فعلا وبتستمد قوتها من العقل وأكبر دليل على كده لو مش بتقدر تجرى وبتخاف من الكلاب وجرى  وراك كلب ممكن تجرى بسرعة 100 كيلو فى الساعه :)

حاجه كمان عقلنا بيقدر يتحكم فى عقول الأخرين إذا إقنع الاخر بانك بتنيم مغناطيسى يعنى المنوم المغناطيسى بيعتمد على اقناعك إنه يقدر ينيمك فيقوم عقلك مهيئ جسمك لده وبالتالى يتحكم فى ارداتك عن طريق تغير سلوكك فى عادة ما إنما مش تحكم لدرجة إنه يخليك تبقى عبد مطيع ليه زى مبيجى فى الافلام

عقلك هو الى بيقدر يتحكم فى اسلوب تصرفك نتيجة خبراتك فى الحياة وبيكون التصرف ناتج عن الخبره دى وعلى فرض إن الإنسان مولود فى غايه ومشفش بشر بنلاقى الشهوه الى بتحركه زى شهوته للطعام والشراب وغيره وأول ميجد بشرى مثله يبتدى عقله يتنبه للتعلم ..ليه لانه مهما كان مش الشهوه بس الى بتحركه إنما عقله هو الى بيتحكم فى ده وهو الى بيفرقه عن الحيوان حتى لو كان عقله بدائى وشبه متوقف إلا أنه يبقى أذكى الكائنات

العقل البشرى علميا قادر على التحليل أسرع من الأجهزه الحديثه حتى الكمبيوتر لان الكمبيوتر بيعتمد على البرمجه واسلوب التحليل الى تم برمجته عليه إنما عقل الإنسان يعتمد على المنطق وأساليب عده للتحليل وقد يكون أحدها مبتكر من العقل ذاته فتعد إكتشاف

العقل البشرى يمكنه أيضا ان يتحكم باحلامنا إذا اقتضت الضرورة ذلك زى مثلا لو كنت عطشان بيجيبلك حلم بشلالات وأنت بتشرب وغيره لو جعان تلاقى الوجبه الى بتحلم بيها ويخليك تستطعم كمان وانت نايم ههههههه :)
بس إوعى تجرب.

من الغريب ايضا ان الحلم بيكون بالنسبه لواقعنا ساعات بنروح ونيجى عمل حاجات كتير وثبت علميا ان الزمن الحقيقى للحلم مجرد ثوانى ممن ثانيه واحده كمان وفى الفتره دى بنشوف أحداث كتيره وده دليل سرعة المعالجه والتحليل الفائق للعقل البشرى اثناء النوم . الحاجت الى بتاخد ساعات فى الواقع بتكون فى ثوانى أثناء النوم .

فيه بقى قدرات خارقه للعقل البشرى بس الوصول ليها صعب ودى بتعتمد على الرأى العلمى الى بيقول إننا بنستخدم 15 % من قدرات عقلنا وبالتالى يبقى 85 % التانين مهملين من القدرات  دى والى البعض بيربط الوصول ليها بممارسة اليوجا عقود طويلة للوصول ليها إماكنية تحريك الأشياء بالتحديق إليها زى فيلم X-MEN بس طبعا الحاجه الى مبشوفهاش مبصدقهاش .

حاجه تانيه من خوارق العقل البشرى السفر الروحى إننا نخلى عقلنا يتحكم فى جسمنا ويدخله فى حالة ارتخاء تصل للنوم بحيث يفضل الوعى والإدراك موجود مع إن الجسم نايم فبيعمل فصل للروح عن طريق مجال للطاقه بيشكل الجسد من جديد من الطاقه وبيقدر يتجول ويسافر وكل حاجه ويرجع الطاقه للجسد وقت ميحب وده كمان تطبيق مش شوفته بس قريت عنه .

من الأشياء الغريبه أيضا عن العقل البشرى إن الإنسان بيتكرر قدامه مشاهد بيحس انها مألوفه فى الأشخاص والفعل والحديث والحدث وطبعا النظريات الى ظهرت بعضها بيقول إن العقل هو الى بيحاول يقنعنا بده والبعض الأخر بيقول إننا عشنا حياة قبل كده قبل حياتنا الأرضيه ولما موقف بيتوافق فى حياتنا مع الحياة دى بنفتكره لنه مسجل داخل عقلنا ولكن غحنا كمسلمين طبعا لا نؤمن بهذا لاننا عارفين بداية الخلق انه ادم وان الحياة الدنيا بندخلها مولودين ونخرج ميتين لكن دى نظرية اتقالت وأحيانا بمر بهذا الشعور يعنى موجود فعلا .

قدرات العقل البشرى قد تتخطى كل ذلك وكل يوم يكتشف العلم فيها الجديد والجديد ولكن يبقى هو المايسترو الذى ينظم عن طريق أداته المخ كل ما يخص شئون أجسادنا وبذلك هو هبة من الهبات التى من الله علينا بها والتى نعجز عن شكر فضلها ونقف عاجزين امامها طويلا.

هناك 22 تعليقًا:

  1. دائما ما تتحفنا يا جمال بجلائل العلم
    اضفت الى علمنا الكثير مما يستحق معه الشكر الجزيل ومنتظربن الجديد من اسرار العلم بعد ان كشفت لنا جميعا الكثير من قدرات العقل البشرى

    ردحذف
    الردود
    1. أستاذى الفاروق
      دائما ما استمتع بقراءة تعليقاتك وأسعد بتواجدك فى مدونتى
      وشكرا لحضرتك على كلامك الجميل
      ومهما بلغ العلم فسيظل هناك الكثير " وما أوتيتم من العلم الا قليلا "

      تحياتى استاذى الغالى

      حذف
  2. مساؤك هنا وسعاده

    طرح راقى ومميز فعلا .. ولا نملك حياله غير ان نقول سبحان الخلاق البديع

    وفى انفسنا البشرية الكثير والكثير من قدرة الرحمن ..
    ادام الله عليك وعلينا الصحة والعافيه

    دمت اخى بكل خير واطروحات مفيده نستمتع بها
    كل الود والاحترام

    ردحذف
    الردود
    1. بسمة الورد
      سلمتى اختى الغاليه
      وحقا هناك الكثير والكثير مما لا نعرفه بعد عن أجسادنا ما يشير كغيره فى الكون الى قدرة الله سبحان وتعالى
      دمتى بكل خير وسعاده
      تحياتى اختى الغاليه

      حذف
  3. سبحان الخالق
    دائما ما يجذبني حديث حضرتك المبسط في موضوعات علمية نحتاج أن نتعمق فيها

    خالص تحياتي وتقديري

    ردحذف
    الردود
    1. د/ ايمان
      سعيد جدا بتواجدك ومرورك
      والحمد لله إن موضوعاتى تنول إعجابك
      تحياتى اختى العزيزة

      حذف
  4. سبحان الله
    انا بجد مذهوله من كلامك عن العقل البشرى ودوره فى التحكم فى اراده وسلوك ومزاج الانسان
    خصوصا موضوع النوم ده
    سبحان الله
    تعرف ان فى ناس دايما بتخاطب عقلها الباطن؟
    ودايما تمدحه وطه بيأثر على مزاجهم وسلوكهم
    سبحان الله.والعقل بيستجيب فعلا
    شكرا على المعلومات الرائعه
    وبعتذر عن التأخير
    تحياتى ومودتى

    ردحذف
    الردود
    1. فمر المدونة
      للعقل البشرىقدرات تفوق كثيرا ما كتبته وهناك قدرات ترقى لمستوى الخيال والأساطير حقا ولكنى غير مصدق لها رغم أنى أمن اننا 15 % فقط من قدراتنا العقلية الا انها تخرج عن حيز العقل ذاته
      وليس هناك داعى للإعتذار كونى متواجده فى اى وقت فالمدونة مدونتك ومدونة أحباء النسر المهاجر جميعا
      تحياتى وشكرا على تواجدك الدائم
      أدام الله عليكى الصحة والعافية

      حذف
    2. فعلا قدرات العقل اليشرى ممكن ان ترقى لدرجه لا يتخيلها بشر
      عارف مثلا انا كنت قرأت موضوع عن تساقط الشعر وفى تجربه جديده مفيده فى ايقاف تساقط الشعر وهى حاله من الاسترخاء بحيث ان الانسان يعمل استرخاء ويغمض عينه ويبدأ يكلم عقله الباطن ويمدحه اولا وبعد كده يقوله انا شعرى قوى انا شعرى جميل. بصيلات شعرى قويه والكتير من الكلمات والجمل الايجابيه التى نحفز العقل الباطن
      وعلامه استجابه العقل الباطن ان بيحصل نوع من الصداع او الدوخه او قشعريه فى الدماغ وده انا جربته فعلا
      لكن بصراحه اما بخاف من موضوع ان الانسان يتكلم مع عقله الباطن لان ممكن يحصل تواصل مع القرين
      ممكن الانسان يتواصل مع قرينه بهذا الشكل دون ان يعلم ويظن انه عقله الباطن والكلام ده صحيح فعلا وفى ناس تضررت كتير بسبب كده

      حذف
    3. قمر المدونة
      موضوع التحدث مع العقل الباطن من الموضوعات التى اعتبرها حد الخرافه لانى جربت الموضوع ده فعلا ولكن الصداع الناتج بيكون مش بسبب استجابة العقل الباطن إنما بسبب شدة التركيز الى بيكون الشخص فيها دا غير إن الانسان لما بيؤمن بان بامكانه التحدث للعقل الباطن فعقله الواعى بيحاول يقنعه ان دماغه مصدعه علشان يحس انه وصل لهدفه يعنى ممكن تكون حيلة من العقل الواعى الى صعب انه يشتغل هو والعقل الباطن فى ذات الوقت العقل الباطن يعمل اما عن طريق الحلم عند الشخص الطبيعى أو التحكم فى الإراده كمن يمشى وهو نايم وده بيكون مريض طبعا أو فى بعض حالات الوسواس القهرى . والى ربط بين ده وسقوط الشعر انسان يعلم ان من مسببات سقوط الشعر كثرة التفكير والحالة المزاجية السيئه أيضا فهو يحاول إستغلال ذلك فى اقناعنا بالنظرية قد تجدى نظرية تقول تستطعين الإندماج مع طاقة الأشياء والتحكم فيها دون لمس عن طريق شدة التركيز على الشئ المراد تحريكه ( نصيحة متجربهاش صدعها قاتل ) والى بيمارس ده دون تاذى فى الغالب محترفى اليوجا لانهم مع التدريب بيكون فى عقولهم الوهم الكافى انهم يمارسوا ده دون ألم
      تحياتى

      حذف
  5. والله انا بتوه فعلا ف مدونتك
    من كثرة الموضوعات المبهرة فيها
    جزاك الله خيرا

    ردحذف
    الردود
    1. رحاب صالح
      والله انا الى سعيد برايك جدا :)
      وشكرا ليكى على إعجابك بما تحوية المدونة
      وما يسعدنى ايضا وجودك الدائم كصاحبة مكان
      واتمنى ان تنول اعجابك دائما
      تحياتى اختى الغاليه

      حذف
  6. أخى الغالى جمال
    إزيك يارب تكون بخير وصحة جيدة ، أحييك جداً على مثل هذا الموضوع الهام والمفيد
    أنت طرحت موضوع جميل ونعمة من نعم الله عز وجل وأحييك على لقب المايسترو اللى أعطيته إياه
    تحياتى أخى الغالى وتمنياتى بالتوفيق ؛؛؛؛

    ردحذف
    الردود
    1. ندى الربيع
      أتمنى تكونى بخير وصحة جيدة
      وشكرا على كلماتك الجميلة والى مش جديدة عليكى
      لقب المايسترو يطلق على الغدة النخامية فى وسط الأطباء لانها تقريبا بتتحكم فى معظم غدد الجسم الصماء وغير الصماء وقد تتعجبى لو علمتى ان حجمها لا يتعدى حجم حبة القمح
      تحياتى أختى العزيزة

      حذف
  7. مقال جميل وكل المعلومات اللي فيه صحيحة فعلا ..
    ولكني لا اؤمن بتناسخ الارواح طبعا ... زي ماحضرتك وضحت

    ردحذف
    الردود
    1. ذات النطافقين
      تلك النظرية التى تعنى استخراج مجال الطاقه ليس المقصود بها تناسخ الأرواح إنما لو سنجد لها اسم قد يكون تحرير الأرواح وطبعا دى من النظريات الى بين الشك والحقيقهلان فيه اشخاص قالوا انهم استطاعوا فعل ذلك ولكن قد يكون خدعه من عقولهم لأجسادهم وانطوت عليهم فالعقل لا يستهان به حقا قادر على ايهامنا بشكل كبير بعد اتجاه الإراده لشئ ما بكل ما بها من جوارح فيضطر العقل لتهيئة ذلك حفاظا على الباقى منه بدل من الجنون المطبق الذى قد ينتج عن عدم الوصول للنتيجه ولكن حقيقتا أنا أيضا لا اصدق هذه النظرية ولكن هناك نظريات اقوى وأشد منها مما يذهب بالعقل لحد الضلال

      حذف
    2. حضرتك تقصد الاسقاط النجمي ؟

      حذف
    3. نعم ولكنى لم ارد ذكره لأسباب ذكرتها فى الموضوع فى مدونة حضرتك

      حذف
    4. انا مهتمة بعلم الطاقة و نفسي اعرف هل هو علم ( نافع ) ولا ( ضار ) و لو نافع ايه تطبيقاته و لو ضار ايه اضراره ؟
      ممكن حضرتك تكتب موضوع فيه ولو مش عاوز ممكن تديني لينك لحاجة توجهني .؟؟

      حذف
    5. إن شاء الله هكتب موضوع فيه ولكن ساحتاج فتره لتجميعه تجميع صحيح وسوف ارسل اليكما توصلت له إذا اردتى الإطلاع بذاتك
      ولكن حاولى ان تحكمى عقلك وفكرك فيما تقراين
      تحياتى

      حذف
  8. موضوع شيق فعلا وانا مؤمنة بان العقل البشري اعظم من اقوي جهاذ كمبيوتر قد يخترعه فمهما كانت عظمة الاختراع فالمخترع اعظم بس المشكلة ان مش ناس كتير بتفهم ده وبتظل منبهرة بالتكنولوجيا اللي هي من وجهة نظرها اعظم من الانسان محدود القدرات مع انها لو فكرت شوية هتلاقي ان الانسان هو اللي صنعها يعني هو بعقله اعظم منها ولو فكرت شويتين هتلاقي ان الكمبيوتر مثلا بيتقبل البيانات اللي بيدخلها الانسان من غير ما يفكر هي صح ولا غلط علي عكس الانسان اللي مش بيتقبل كل اللي بتدركه حواسه ولو اتعمقوا شوية كمان هيدركوا عظمة الخالق الذي اوجد هذا الانسان

    ردحذف
    الردود
    1. أنا سعيد جدا برايك واسلوبك خصوصا ان دى اول تعليق فى مدونتى الى اتمنى انها تعجبك
      الكمبيوتر كل ما يميزه هو السرعه فى معالجة البيانات مقارنه بالعقل البشرى لكن ده طبعا وفقا للبرمجه بتاعته يعنى فىالنهايه الى بيبرمجه هو العقل البشرى زى بالظبط الى بيفرم لحمه فى فرامة يدوى والى بيفرم على فرامه كهربا الى ان العقل البشرى يظل هو الأذكى ولم يكن أبدا للمصنوع فضل على الصانع
      شكرا لمرورك وتشريفى بالتعليق
      تحياتى أختى العزيزه

      حذف